প্ৰশ্নঃ বিদ্যুত প্ৰবাহ বুলিলে কি বুজা ? ইয়াৰ গাণিতিক প্ৰকাশ লিখা। ইয়াৰ একক কি ? ঊত্তৰঃ বিদ্যুত প্ৰবাহ হৈছে একক সময়ত কোনো বিশেষ ক্ষেত্ৰফলৰ মাজেৰে চালিত আধানৰ পৰিমান। অন্য কথাত ই হৈছে বিদ্যুত আধানৰ প্ৰবাহৰ হাৰ। যদি কোনো পৰিবাহীৰ যিকোনো প্ৰস্হচ্ছেদৰ মাজেৰে t সময়ত Q আধান চালিত হয় তেতিয়া প্ৰস্হচ্ছেদৰ মাজেৰে বিদ্যুত প্ৰবাহ হব I=Q/t বিদ্যুত প্ৰবাহক এম্পিয়াৰ এককত প্ৰকাশ কৰা হয়। প্ৰশ্নঃ বিদ্যুত আধান কি ? ইয়াৰ একক লিখা। ঊত্তৰঃ যিটো ধৰ্মৰ কাৰণে পদাৰ্থৰ কণা সমূহ(যেনে ইলেক্ট্ৰণ, প্ৰটন)এ বিপৰীতধৰ্মী কণাসমূহক আকৰ্ষণ আৰু একে জাতীয় কণাক বিকৰ্ষণ কৰে সেইটো ধৰ্মই হৈছে বিদ্যুত আধান। ইয়াৰ একক কুলম্ব । প্ৰশ্নঃ বিদ্যুত পৰিবাহী কি ? ঊত্তৰঃ যিবিলাক পদাৰ্থৰ মাজেৰে বিদ্যুত প্ৰবাহ চালিত হব পাৰে , সেইবোৰক বিদ্যুত পৰিবাহী বোলে। প্ৰশ্নঃ বৰ্তনী কি ? ঊত্তৰঃ বিদ্যুত প্ৰবাহৰ নিৰবিচ্ছিন্ন আৰু বন্ধ পথ এটাকে বৰ্তনী বোলে। প্ৰশ্নঃ এক এম্পিয়াৰ প্ৰবাহৰ সংজ্ঞা দিয়া। ঊত্তৰঃ প্ৰতি ছেকেন্ডত এক কুলম্ব আধানৰ প্ৰবাহক এক এম্পিয়াৰ প্ৰবাহ বোলে। অৰ্থাত 1A=1C/1s ...
Comments
Post a Comment